फलेबास पर्वत असोज २२ । एकीकृत नेकपा (माओवादी)का उपाध्यक्ष डा.बाबुराम भट्टरार्इले दलहरू राष्ट्रपतिको कदम सच्याउने पक्षमा नलागे आफुहरू भिषण आन्दोलनमा जाने चेतावनी दिँदै आन्दोलनको आँधीले माओवादीबाहेकका दलको हैसियत देखाइदिने बताउनु भएको छ ।
एकीकृत नेकपा (माओवादी) पर्वतद्धारा बुधबार कुश्मा बजारमा आयोजित अन्तरक्रियामा डा. भट्टराईले सहमतिका लागि माओवादीले हदैसम्मको लचकता अपनाए पनि सत्ताधारी दलले नै संसद अवरुद्ध पारेका बताउदै ‘माओवादी सहमतिका लागि जुनसुकै विकल्प रोज्न तयार छ‘ भन्दै अवरुद्ध संसद र राजनीतिक गतिरोध अन्त्यका लागि राष्ट्रपतिको कदमको भने सम्बोधन हुनुपर्ने अडान दोहोर्याउनुभयो ।
उहाले अब हुने माओवादी आन्दोलनले जनताको सच्चा गणतन्त्र स्थापना गर्ने बताउदै राष्ट्रपतिको कदमको जगबाट बनेको सरकारले तत्काल राजिनामा दिएर बाटो खुला गर्नु पर्ने बताउनु भयो ।
सो कार्यक्रममा उहाले नयाँ सरकारका लागि बाटो खुला गर्ने विषयमा अध्यक्ष प्रचण्ड र प्रधानमंत्री माधबकुमार नेपालको भेटवार्ता भएको दावि पनि गर्नु भयो ।
कार्यक्रममा माओवादी प्रवक्ता दीनानाथ शर्मा, केन्द्रीय सदस्यहरू हरिभक्त कँडेल, देवेन्द्र पौडेल, हीतमान शाक्यलगायतको सहभागिता थियो ।
यसअघि बागलुङको बुर्तिवाङमा आयोजित कार्यक्रममा बोल्दै उपाध्यक्ष डा.भट्टराईले आफ्नो पार्टीले राष्ट्रपतिका विरुद्ध महाअभियोग ल्याउनसक्ने खुलासा गर्नुभयो।
क्रान्तिकारी पत्रकार सङ्घले आयोजना गरेको पत्रकारसम्मेलनमा उहाँले सत्ता साझेदार दलले दिएको चुनौतीलाई विकल्पका रूपमा प्रस्तुत गर्नसकिने दाबी गर्नु भयो ।